नवी दिल्ली : केंद्रीय माध्यमिक शिक्षण मंडळाच्या (सीबीएसई) परीक्षा मूल्यांकन प्रक्रियेवर प्रश्न उपस्थित करणाऱ्या बारावीच्या एका विद्यार्थ्याला सोशल मीडियावर मोठ्या प्रमाणात ट्रोलिंगचा सामना करावा लागला. काही दक्षिणपंथी विचारसरणीशी संबंधित यूजर्सनी त्याला ‘पाकिस्तानी’ असेही संबोधले. दरम्यान, सीबीएसईने ऑन-स्क्रीन मार्किंग (OSM) प्रणालीतील तांत्रिक बिघाडामुळे चुकीची स्कॅन केलेली उत्तरपत्रिका विद्यार्थ्याच्या रोल नंबरवर अपलोड झाल्याची कबुली दिली आहे.
यंदा बोर्ड परीक्षांच्या मूल्यांकनासाठी सुरू करण्यात आलेल्या नव्या ऑन-स्क्रीन मार्किंग प्रणालीवर सातत्याने टीका होत आहे. अनेक विद्यार्थ्यांनी पोर्टल क्रॅश होणे, पेमेंटसंबंधी अडचणी, अस्पष्ट स्कॅन कॉपी, गायब पाने तसेच चुकीच्या उत्तरपत्रिका अपलोड होण्याच्या तक्रारी केल्या आहेत.
या सर्व प्रकारामुळे मूल्यांकन प्रक्रियेची पारदर्शकता, अचूकता आणि विश्वासार्हता यावर प्रश्नचिन्ह निर्माण झाले आहे. बारावीचा विद्यार्थी वेदांत श्रीवास्तव याने आरोप केला होता की, सीबीएसईने त्याच्या रोल नंबरवर अपलोड केलेली फिजिक्सची उत्तरपत्रिका त्याची नव्हती. हा मुद्दा सोशल मीडियावर मांडल्यानंतर त्याला मोठ्या प्रमाणावर ट्रोल करण्यात आले.
सीबीएसईने मान्य केली चूक
सोमवारी (२५ मे) रात्री वेदांत श्रीवास्तव यांनी एक्स (पूर्वीचे ट्विटर) वर अनेक पोस्ट करत म्हटले की, “आमचे म्हणणे योग्य होते आणि उत्तरपत्रिका खरोखरच बदलल्या गेल्या होत्या.”
त्यांनी पुढे लिहिले, “सीबीएसईने आता माझी योग्य उत्तरपत्रिका आम्हाला पाठवली आहे. संध्याकाळी बोर्डाच्या अधिकाऱ्यांनी आमच्याशी संपर्क साधून योग्य उत्तरपत्रिका पाठवली. आमचा दावा खरा ठरला असून कॉप्या बदलल्या गेल्या होत्या.”
या प्रकरणानंतर सीबीएसईच्या डिजिटल मूल्यांकन प्रणालीबाबत विद्यार्थ्यांमध्ये आणि पालकांमध्ये चिंता वाढली आहे.
Leave a Reply